Yeni rəqəmlər, yeni kreditlər
İqtisadiyyat Nazirliyinin Sahibkarlığa Kömək Milli Fondu oktyabrın 28-i Xəzər rayonunun Mərdəkan qəsəbəsində işgüzar forum keçirib. 100-ə yaxın sahibkarın qatıldığı forumda çıxış edən Sahibkarlığa Kömək Milli Fondunun icraçı direktoru Şirzad Abdullayev deyib ki, 2016-ci ildə ölkə üzrə 1876 sahibkarlıq subyekti 123,8 milyon manat güzəştli kredit alıb: “Bu kreditlər hesabına maliyyələşdirilən layihələr 5900-a yaxın yeni iş yerinin yaradılmasına imkan verir. Ümumilikdə isə indiyədək paytaxt qəsəbələrində sahibkarlıq subyektlərinin 1300-dən çox investisiya layihəsinə 344,6 milyon manat güzəştli kredit yönəldilib”.
Economy.gov.az-ın məlumatına görə, Mərdəkan forumunda Bakı qəsəbələrində fəaliyyət göstərən 16 sahibkara 905 min manat güzəştli kredit verilib. Əsasən quşçuluq, tərəvəzçilik, mebel, karton məhsulları, un məmulatları istehsalı sahələrinin inkişafına yönəldiləcək kreditlərin reallaşdırılması hesabına 50-dən çox yeni iş yerinin açılması mümkündür.
