Nazirlik əlillərlə bağlı 9 aylıq hesabat yayıb
Əmək və Əhalinin Sosial Müdafiəsi Nazirliyi bu ilin yanvar-sentyabr aylarında 6381 nəfəri əlillərin bərpa-müalicə müəssisələrində bərpa-müalicə xidmətləri ilə təmin edib. Bu, ötən ilin müvafiq dövrü ilə müqayisədə 30 faizədək çoxdur.
Rəsmi hesabata görə, 9 ayda nazirliyin Protez-Ortopedik Bərpa Mərkəzi, onun Gəncə şəhərindəki filialı və Naxçıvan istehsalat sahəsi 10676 əlil şəxsə (ötən ilin müvafiq dövrü ilə müqayisədə 49,2 faiz çox) dayaq-hərəkət sisteminin itirilmiş funksiyalarının bərpası məqsədilə protez-ortopedik bərpa xidmətləri göstərilib.
128 nəfər xaricdə ixtisaslaşmış bərpa müalicəsi təşkil edilib.
Yanvar-sentyabr aylarında Əmək və Əhalinin Sosial Müdafiəsi Nazirliyinin xətti ilə bərpa-müalicə və protez-ortopedik xidmətlərlə təmin olunanların sayı ümumilikdə 17185 nəfər təşkil edib, bu da 2015-ci ilin eyni dövrü ilə müqayisədə 4876 nəfər və ya 39,6 faiz çoxdur.
