Dini zəmində cinayətlərin cəzası ağırlaşır
Azərbaycanda dini düşmənçilik, radikalizm və ya fanatizm zəminində cinayətlərin cəzası sərtləşir. Report.az-ın xəbərinə görə, Milli Məclisin 28 oktyabr iclasında Cinayət Məcəlləsinə bununla bağlı yeniliklər edilib. Yeniliyə əsasən, dini düşmənçilik, radikalizm və ya fanatizm zəminində şəxsi hər hansı dinə (dini cərəyana) etiqada, o cümlədən dini ayin və mərasimləri yerinə yetirməyə, dini ayin və mərasimlərdə iştiraka, dini təhsil almağa məcbur edən şəxslərin 7000 manatdan 9000 manata qədər cərimələnməsi, 2 ildən 5 ilədək müddətə azadlıqdan məhrum edilməsi nəzərdə tutulur.
Məcəllənin terrorçuluqla bağlı maddəsindəki dəyişikliyə əsasən, dini düşmənçilik, dini radikalizm və ya dini fanatizm zəminində törədilən əməllərə görə 14 ildən 20 ilədək müddətə azadlıqdan məhrumetmə və ya ömürlük azadlıqdan məhrumetmə cəzası tətbiq ediləcək.
Cinayət Məcəlləsində başqa bir dəyişikliyə görə, dini düşmənçilik, dini radikalizm və ya dini fanatizm zəminində silahlı birləşmələr və ya qruplar yaratma, həmin birləşmə və ya qruplarda iştiraka görə 6 ildən 10 ilədək müddətə azadlıqdan məhrumetmə tətbiq olunacaq.
Milli Məclisin iclasında “Dini etiqad azadlığı haqqında” qanuna da dəyişiklik edilib. Dəyişiklik dini ekstremist fəaliyyətlə məşğul olan dini qurumun ləğvini nəzərdə tutur.
