Müxalifətçi dövlətdən 11 min avro uddu
Oktyabrın 27-də Avropa İnsan Hüquqları Məhkəməsi Azərbaycan Respublikasını cərimələyib. Qərara görə, dövlət seçki hüququ ilə bağlı şikayətin ədalətli araşdırılmamasından narazı olan müxalifətçi Aydın Şükürova 11 min avro ödəməlidir.
Azadliq.org xəbər verir ki, 2010-cu ilin parlament seçkisində Zəngilan-Qubadlı seçki dairəsindən AXCP-nin namizədi olmuş Aydın Şükürov saxtakarlığa yol verildiyi iddiası ilə şikayətçi olub, məhkəmə çəkişmələri aparıb, ölkədə müdafiə vasitələrini bitirərək Avropa İnsan Hüquqları Məhkəməsinə üz tutub.
Avropa Məhkəməsinin qərarında qeyd edilir ki, seçki komissiyaları, milli məhkəmələr Aydın Şükürovun şikayətlərinə baxarkən onun seçki hüququnu pozublar. Dövlətin Aydın Şükürovun fərdi şikayətlər hüququnu məhdudlaşdırdığı da vurğulanır.
Qərara əsasən, dövlət ərizəçiyə təzminat və hüquq məsrəflərindən ötrü 11 min avro ödəməli, iş üzrə ədalətli araşdırma aparılmasını təmin etməlidir.
