Jurnalistin qətl işi: ilk etiraf olub
Rusiyanın Sankt-Peterburq şəhərində jurnalist Dmitri Çilikinin qətlində təqsirləndirilən tələbə Sergey Kosırev günahını boynuna alıb. Novator.az-ın məlumatına görə, Sankt-Peterburqun Kalinin Şəhər Məhkəməsinin təmsilçisi belə açıqlama verib.
Oktyabrın 27-də məhkəmədə jurnalistin qətl işi üzrə hazırlıq iclası keçirilib. İşə baxılması noyabrın 14-nə təyin edilib.
Məhkəmə təmsilçisi mətbuata açıqlamasında bildirib ki, Kosırev jurnalisti öldürdüyünü və onu soyduğunu qismən etiraf edib.
54 yaşlı jurnalist Dmitri Çilikinin meyiti 2016-cı ilin aprelin 1-də yaşadığı mənzildə aşkarlanmışdı. Jurnalistin bir neçə gün əvvəl aldığı bıçaq yaralarından öldüyü bildirilirdi. Hüquq mühafizə orqanları aprelin 6-da şübhəli şəxs qismində ali məktəblərdən birinin tələbəsi, 21 yaşlı Sergey Kosırevi həbs edib.
İstintaqın məlumatına görə, Kosırev Çilikinlə internetdə tanış olub və martın 27-də jurnalistin evində onun qonağı olub. Evdə onların arasında mübahisə düşüb, nəticədə Kosırev jurnalistə çoxsaylı bıçaq zərbələri endirib və ona məxsus telefon, noutbuk, içərisində 43,5 min rubl olan pulqabısını oğurlayıb.
Dmitri Çilikin “Ças pik” qəzetində “Mədəniyyət və cəmiyyət” rubrikasının redaktoru, bir neçə televiziya və radio kanalında proqramların müəllifi və aparıcısı olub.
Səidə Hüseynova
