Hansı ölkənin pasportu güclüdür?
Dünya İqtisadi Forumu 2016-cı ilin pasport reytinqini açıqlayıb. Novator.az xəbər verir ki, reytinq xarici ölkəyə vizasız səfər meyarı əsasında tərtib olunub.
Reytinqə görə, Azərbaycan vətəndaşları 62 ölkəyə vizasız daxil ola bilirlər. Bu sarıdan Gürcüstan Azərbaycandan irəlidə, Ermənistan geridədir. Gürcüstan vətəndaşları 68, Ermənistan vətəndaşları 60 ölkəyə vizasız səfər edə bilir.
Türkiyə vətəndaşları 103, Rusiya və Moldova vətəndaşları 104, Estoniya və Litva vətəndaşları 147, Latviya vətəndaşları 148 ölkəyə vizasız daxil olurlar.
Şimali Koreya vətəndaşları 40, Cənubi Koreya vətəndaşları 156 ölkəyə vizasız gedə bilir.
Qazaxıstan və Belarus vətəndaşlarının 67, Ukrayna vətəndaşlarının 86, İran vətəndaşlarının 37, İraq vətəndaşlarının 29 ölkəyə vizasız səfər etmək imkanı var.
Reytinqdə sonuncu yerlərdə Pakistan və Əfqanıstan gəlir. Pakistan vətəndaşları 24, Əfqanıstan vətəndaşları 27 ölkəyə vizasız daxil olur.
Reytinqin ilk pilləsində Almaniya və İsveç dayanır. Bu ölkələrin vətəndaşları 158 ölkəyə vizasız səfər edirlər.
İkinci pillədə Böyük Britaniya, Fransa, İspaniya, İsveçrə və Finlandiya qərarlaşır. Bu ölkələrin vətəndaşlarının 157 ölkəyə vizasız çıxış imkanı var.
ABŞ vətəndaşları 155 ölkəyə vizasız səfər edə bilir.
