General Əli Kazımov vəfat edib
İstefada olan general-mayor Əli Kazımov vəfat edib. Müdafiə Nazirliyi rəhbərliyinin yaydığı nekroloqda generalın oktyabrın 26-da vəfat etdiyi bildirilir.
Əli İmran oğlu Kazımov 17 fevral 1956-cı ildə Ordubadda anadan olub. Xəzər Ali Hərbi-Dəniz Məktəbini bitirib. 1978-1989-cu illərdə Şimal Donanmasında mühafizə gəmisində şturman, atom sualtı qayığında qrup komandiri, xilasedici gəmilər divizionu komandiri və maqnitsizləşdirmə gəmisinin komandiri olub.
1989-1992-ci illərdə Leninqrad şəhərində Arxa Cəbhə və Nəqliyyat Hərbi Akademiyasının komandanlıq fakültəsində təhsil alan Əli Kazımov SSRİ dağıldıqdan sonra Azərbaycana qayıdıb və 1992-ci ilin sentyabrından 1993-cü ilin noyabr ayınadək Hərbi Dəniz Qüvvələri qərargahının təşkilat-səfərbərlik və komplektləşdirmə bölməsinin rəisi vəzifəsində xidmət edib.
1993-cü ilin dekabr ayından 1994-cü ilin sentyabr ayınadək cəbhə bölgəsində briqada komandirinin arxa cəbhə üzrə müavini vəzifəsində Azərbaycanın ərazi bütövlüyü uğrunda döyüşlərin iştirakçısı olub.
1995-ci ildə Bakı Ali Hərbi Dənizçilik Məktəbində iqtisadiyyat və qoşun təsərrüfatı, qoşunların arxa cəbhəsi kafedralarının rəisi, 1995-ci ilin iyun ayından isə Müdafiə Nazirliyi Təşkilat-Səfərbərlik İdarəsi rəisinin müavini və Təşkilat-Səfərbərlik İdarəsinin rəisi-Baş Qərargah rəisinin müavini vəzifəsini icra edib.
Sonralar müdafiə nazirinin məsləhətçisi, müşavirlər qrupunun müşaviri, inspektorlar qrupunun inspektoru vəzifələrində xidmət edən general-mayor 17 oktyabr 2014-cü ildə xəstəliyə görə istefaya buraxılmışdı.
Allah rəhmət eləsin!
