Dünyada heyvanların sayı sürətlə azalır
Dünyada onurğalılar sinfindən olan heyvanların – məməlilərin, quşların, balıqların, suda-quruda yaşayanların və sürünənlərin sayı sürətlə azalır. Novator.az xəbər verir ki, bununla bağlı Dünya Vəhşi Təbiət Fondu məruzə hazırlayıb.
Məruzə fondun London Zoologiya Cəmiyyəti ilə birgə apardığı araşdırmaya əsaslanır. Araşdırma göstərib ki, 1970-ci ildən 2012-ci ilə qədər dünyada məməlilərin, quşların, balıqların, suda-quruda yaşayanların və sürünənlərin sayı 58% azalıb.
Dünya Vəhşi Təbiət Fondunun məruzəsinə görə, mütəxəssislər 2020-ci ilədək bu rəqəmin 67% olacağı qənaətindədirlər.
Məruzədə heyvanların azalması insanların fəaliyyəti ilə əlaqələndirilir. Bildirilir ki, insanlar fermer təsərrüfatını genişləndirmək və şəhərlər salmaq üçün daha çox torpaq zəbt edirlər.
Heyvanların nəslinin azalmasına ətraf mühitin çirklənməsi, iqlim dəyişikliyi, ovçuluq, həmçinin insanın yerli təbii şəraitə uyğun olmayan qeyri-tipik bitki və heyvanları gətirməsi də səbəb olur.
Məruzəyə görə, göldə, çayda, bataqlıqda yaşayan heyvanların nəsli daha sürətlə azalır. Son 40 ildə şirin suda yaşayan heyvanların sayı 81% azalıb.
Səidə Hüseynova
