Prezident hökuməti istefaya göndərdi
Qırğızıstan prezidenti Almazbek Atambayev oktyabrın 26-da hökuməti istefaya göndərib. Novator.az-ın məlumatına görə, hökumətin istefası 4 fraksiyadan formalaşan parlament koalisiyasının statusunun rəsmi şəkildə qüvvədən düşməsi ilə bağlıdır.
Prezidentə dəstək verən Sosial Demokrat Partiyası bu həftə hökumət koalisiyasından çıxıb. Sosial demokratlar bunu koalisiyada fikir ayrılıqları ilə əsaslandırıb.
Hökumət koalisiyasını Sosial Demokrat Partiyası 2015-ci ilin noyabrında Respublika – Ata Yurd, Tərəqqi və Qırğızıstan partiyaları ilə birgə yaratmışdı.
Nazirlər Kabineti üzvləri yeni hökumət qurulana qədər səlahiyyətlərini icra edəcək. Dövlət başçısı 3 gün ərzində başqa bir partiyaya koalisiya yaratmaq səlahiyyəti verməlidir.
Qırğızıstanda ötən ilin oktyabr ayında keçirilmiş parlament seçkisində ən çox mandatı Sosial Demokrat Partiyası qazanıb – 38 mandat. 120 yerlik parlamentdə Respublika – Ata Yurd Partiyası 28, Qırğızıstan Partiyası 18, Tərəqqi Partiyası 13, Bir Bol Partiyası 12, Ata Məkan Partiyası 11 yer alıb.
