İdman mərc oyunlarına nəzarət sərtləşdi
Prezident İlham Əliyev “Bədən tərbiyəsi və idman haqqında” qanunun tətbiq edilməsi barədə” 27 avqust 2009-cu il fərmanında dəyişikliklər edib. Novator.az-ın məlumatına görə, dövlət başçısının oktyabrın 25-də imzaladığı fərmanla sənədə bu hissələr əlavə olunub:
– Rabitə və Yüksək Texnologiyalar Nazirliyinə tapşırılsın ki, Azərbaycan Respublikasında idman mərc oyunlarının operatoru ilə müqavilə bağlamadan fəaliyyət göstərən idman mərc oyunlarının həm yerli, həm də xarici virtual satıcılarının internet portallarının və saytlarının ölkə ərazisində fəaliyyətinin qarşısının alınması üçün zəruri tədbirlər görsün.
– Daxili İşlər və Vergilər nazirliklərinə tapşırılsın ki, akkreditasiya olunmadan idman mərc oyunlarının təşkilinə və ya keçirilməsinə qarşı mübarizədə fəaliyyətin əlaqələndirilməsini təmin etsinlər, həmin oyunları qanunsuz təşkil edən və ya keçirən şəxslərin qanunla müəyyən edilmiş qaydada məsuliyyətə cəlb edilməsi və belə halların gələcəkdə baş verməməsi üçün tədbirlər görsünlər.
Azərbaycanda idman mərc oyunlarının operatorluğunu Maliyyə Bazarlarına Nəzarət Palatası həyata keçirir.
