Gürcüstan ikinci tura hazırlaşır
Oktyabrın 30-u Gürcüstanda parlament seçkisinin ikinci turu keçiriləcək. 50 dairə üzrə seçkinin əsas iştirakçıları hakim Demokratik Gürcüstan Partiyası (“Gürcü arzusu”) və Müxalif Vahid Milli Hərəkat Partiyasıdır. Novator.az-ın məlumatına görə, 46 dairədə bu iki qüvvənin namizədləri üz-üzə gələcək.
Seçkinin ilk turu oktyabrın 8-də olub. “Gürcü arzusu” proporsional sistem üzrə 44 mandat qazanıb. Vahid Milli Hərəkat Partiyası 27 mandat, millətçi mövqedə dayanan Vətənpərvərlər Alyansı 6 mandat götürüb. Majoritar sistemdə isə “Gürcü arzusu” 23 mandata sahib çıxıb.
150 yerlik parlamentin 77 deputatı proporsional (partiya siyahıları üzrə), 73 deputatı majoritar (dairələr üzrə) üsulla seçilir. Hökuməti parlamentdə 76 mandat əldə edən partiya formalaşdırır.
“Gürcü arzusu”nun hökumət qurması üçün ikinci turda 9 mandata ehtiyacı var. Vahid Milli Hərəkat Partiyası isə bundan ötrü 49 mandat əldə etməlidir.
Hakim partiya ikinci turda 46 mandat götürərsə, 113 deputatla konstitusion çoxluq əldə etmiş olacaq. 113 səs Gürcüstan Konstitusiyasını dəyişmək imkanı verir.
