Dövlət qurumlarının internet resursları monitorinq olunub
“Multimedia” İnformasiya Sistemləri və Texnologiyaları Mərkəzi dövlət qurumlarının internet resurslarının monitorinqinə əsaslanan informasiya açıqlığı hesabatı yayıb. Bu ilin iyun-oktyabr aylarında aparılan monitorinqlər zamanı 70 mərkəzi icra hakimiyyəti orqanı və 68 yerli icra hakimiyyəti orqanının rəsmi internet resursları təhlil edilib.
Saytların informasiya açıqlığı vəziyyəti 60 parametr üzrə kəmiyyət və keyfiyyət meyarları və sosial əhəmiyyətlilik səviyyəsi nəzərə alınmaqla təhlil edilib. 70 mərkəzi icra qurumu üzrə orta informasiya açıqlığı göstəricisi 61,5% olub.
Vergilər Nazirliyi internet resurslarının informasiya açıqlığı üzrə 79,1%-lə birinci yerdədir. İlk onluqda daha sona Dövlət Qulluğu Məsələləri üzrə Komissiya (78,5%), Dövlət Neft Fondu (78,2%), Əmək və Əhalinin Sosial Müdafiəsi Nazirliyi (77,4%), Hesablama Palatası (76,5%), Rabitə və Yüksək Texnologiyalar Nazirliyi (76,1%), Mədəniyyət və Turizm Nazirliyi (75,4%), Dövlət Neft Şirkəti (75%), Ekologiya və Təbii Sərvətlər Nazirliyi (74,8%) və “ASAN xidmət” (74,2%) yer alır.
