Daşınmaz əmlaka dair çıxarış: sənədlərin siyahısı açıqlanıb
Əmlak Məsələləri Dövlət Komitəsinin rəsmi internet səhifəsi yenilik tətbiq edib: vətəndaşlara məxsus daşınmaz əmlaka dair çıxarış üçün tələb olunan sənədlərin siyahısı verilən link yaradılıb. Linkdə mənzil fondunun özəlləşdirilməsi, fərdi yaşayış evlərinin ilkin qeydiyyatı, daşınmaz əmlakın təsvirinə, dövlət qeydiyyatına alınmış hüquqlara və onların məhdudlaşdırılmasına (yüklülüyünə) dair arayışın verilməsi üçün tələb olunan sənədlərin siyahısı əksini tapıb. Həyətyanı torpaq sahəsi və bağ evi olan vətəndaşlar da bu əmlakların ilkin qeydiyyatı üçün zəruri sənədlərin siyahısını linkdə görə bilərlər.
Rəsmi məlumata görə, linkdə fərdi və kooperativ bağ sahələri (boş torpaq sahələri) üzərində hüquqların ilkin qeydiyyatı üçün tələb olunan sənədlərin siyahısı da var.
Kollektiv bağçılıq-yoldaşlıq təsərrüfatının istifadəsindəki bağ sahələrinin ilkin qeydiyyatı bağlı sənədlərlə də tanış olmaq mümkündür. Bu siyahı yalnız 1 yanvar 2001-ci ilədək ayrılmış torpaq sahələrinin qanuni istifadəçilərinə şamil edilir.
Linkdə Daşınmaz Əmlakın Dövlət Reyestri Xidməti qurulandan əvvəl yaranmış mülkiyyət hüquqlarının qeydiyyatı ilə bağlı sənədlərin siyahısı da yer alır.
