Qiyas İbrahimova 10 il həbs verildi
Oktyabrın 25-də Bakı Ağır Cinayətlər Məhkəməsində gənc fəal Qiyas İbrahimova hökm oxunub.
Hakim Ənvər Seyidovun sədrliyi ilə keçirilən prosesdə Qiyas İbrahimov 10 il müddətinə azadlıqdan məhrum edilib.
Dövlət ittihamçısı gənc fəalın 9 il azadlıqdan məhrum olunmasını təklif etmişdi.
Qiyas İbrahimov Cinayət Məcəlləsinin 234.4.1-ci (qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma, qabaqcadan əlbir olan bir qrup şəxs tərəfindən və ya mütəşəkkil dəstə tərəfindən törədildikdə) və 234.4.3-cü (külli miqdarda törədildikdə) maddələri ilə təqsirli bilinib.
Qiyas İbrahimov və digər gənc fəal Bayram Məmmədov bu il mayın 10-da saxlanıblar. Mayın 12-də Xətai Rayon Məhkəməsində onların hər ikisi barəsində həbs qətimkan tədbiri seçilib. Həmin vaxt Daxili İşlər Nazirliyi bəyan edib ki, Bayram Məmmədovun üzərindən 2,9 qram, evindən 1 kiloqram 150 qram heroin, Qiyas İbrahimovun üzərindən 2,607 qram, yaşadığı mənzildən 1 kilo 10 qram heroin tapılıb.
Müdafiəçiləri isə hər iki gəncin siyasi sifarişlə tutulduğunu iddia edirlər. Bildirilir ki, mayın 10-na gecə Bakının mərkəzində Heydər Əliyevin abidəsinin üzərində etirazçı şüarlar yazılıb. Müdafiəçiləri gənclərin bu şüarlara görə saxlandığını vurğulayırlar.
Bayram Məmmədovun da işi Bakı Ağır Cinayətlər Məhkəməsindədir. İş üzrə hazırlıq iclası noyabrın 1-nə təyin olunub.
