Qadınlara zorakılıqla bağlı 1747 cinayət qeydə alınıb
Oktyabrın 25-i Bakıda Ailə, Qadın və Uşaq Problemləri üzrə Dövlət Komitəsi, BMT-nin Əhali Fondu və ABŞ-ın Beynəlxalq İnkişaf Agentliyinin birgə təşkilatçılığı ilə “Azərbaycanda gender əsaslı zorakılıqla mübarizə” layihəsinin açılış mərasimi keçirilir.
AZƏRTAC xəbər verir ki, mərasimdə çıxış edən Ailə, Qadın və Uşaq Problemləri üzrə Dövlət Komitəsinin sədri Hicran Hüseynova ailə strategiyası, məişət zorakılığı ilə mübarizəyə dair milli fəaliyyət planının layihələrinin hazırlandığını bildirib. O, sənədlərin selektiv abortlar, erkən nikahla və ailədə zorakılıqla mübarizə sahələrini əhatə edəcəyini qeyd edib.
APA-nın məlumatına əsasən, Daxili İşlər Nazirliyinin yetkinlik yaşına çatmayanlarla profilaktik isin təşkili şöbəsinin rəisi Adıgözəl Adıgözəlov çıxışında deyib ki, bu ilin doqquz ayı ərzində Azərbaycanda qadınlara qarşı 4552, o cümlədən zorakılıqla bağlı 1747 cinayət qeydə alınıb, bu əməllərə görə 2104 nəfər məhkəmə məsuliyyətinə cəlb olunub.
Şöbə rəisinin sözlərinə görə, cinayətlərin 13 faizi, yəni 4552-dən 591-i və ya hər səkkizincisi ailə-məişət münaqişəsi zəminində baş verir.
