Hillari 70-ə doğru
ABŞ-da 2016-cı il noyabrın 8-də keçiriləcək prezident seçkisində Demokratlar Partiyasının vahid namizədi Hillari Klintonun 69 yaşı tamamlanır. Novator.az onun ömür yolunu təqdim edir.
Hillari Dayan Rodem Klinton 26 oktyabr 1947-ci ildə Çikaqoda doğulub. 1969-cu ildə Uellsli Kollecini, 1973-cü ildə Yel Universitetinin hüquq fakültəsini bitirib.
Əmək fəaliyyətinin başlanğıcında Hillari Konqresin Nümayəndələr Palatasının hüquq komitəsinin aparatında və uşaqları müdafiə fondunda çalışıb.
1975-ci ildə Bill Klintonla ailə qurandan sonra Arkanzas Universitetinin hüquq fakültəsində dərs deyib, ardınca “Rose Law Firm” hüquq firmasında çalışıb.
1978-ci ildə ABŞ prezidenti Cimmi Karter Hillari Klintonu Hüquq Xidmətləri Korporasiyasının idarə heyətinin üzvü təyin edib.
Bill Klinton Arkanzasın qubernatoru postunda çalışarkən (1979-1981 və 1983-1993-cü illər) Hillari Klinton ştatın ictimai həyatında, o cümlədən təhsil, səhiyyə və uşaq hüquqlarını müdafiə sahələrində fəal iştirak edib.
1986-1992-ci illərdə Hillari Klinton “Wal-Mart Stores” şirkətinin direktorlar şurasının üzvü olub.
1993-2001-ci illərdə ABŞ prezidenti postunu tutmuş Bill Klintonun hakimiyyətinin ilk dövründə (1993-1994) səhiyyədə islahatlar üzrə operativ komitəyə rəhbərlik edib.
2001-2009-cu illərdə Hillari Klinton Senatda Nyu-York ştatının təmsilçisi olub.
2008-ci ildə Demokratlar Partiyasından prezidentliyə iddia edən Hillari Klinton sonradan Barak Obamanın namizədliyini dəstəkləyib və 2009-2013-cü illərdə ABŞ-ın dövlət katibi postunu tutub.
Hillari və Bill Klintonların bir qızı (Çelsi), iki nəvəsi var. 1980-ci il təvəllüdlü Çelsi Klinton bir qız, bir oğlan anasıdır, əri bankirdir.
