Export.az saytı fəaliyyətə başlayıb
Azərbaycanda istehsal edilən məhsul və xidmətlərin ixrac portalı istifadəyə verilib: www.export.az. Xəbəri oktyabrın 25-də İqtisadiyyat Nazirliyi yayıb.
Portalda axtarış sistemi vasitəsilə məhsulun adını və ya gömrük kodunu qeyd etməklə Azərbaycanda istehsal edilən qeyri-neft məhsulları barədə məlumat əldə etmək mümkündür. Saytın “Kataloq” hissəsində iqtisadiyyatın müxtəlif sahələrində fəaliyyət göstərən şirkətlər haqqında ümumi məlumat, məhsulların ixrac olunduğu ölkələr, hədəf ölkələri, məhsulların kataloqu, şirkətlərin malik olduğu sertifikatlar və s. kimi bilgilər əks olunub.
Portaldan istifadə üçün həm yerli, həm də xarici şirkətlər qeydiyyatdan keçməlidir. İstifadəçi qeydiyyatdan keçdikdən sonra öz şirkəti və məhsulları barədə məlumatı portala daxil edə bilər.
Azərbaycan və ingilis dillərində fəaliyyət göstərən portalın yaxın vaxtlarda rusdilli versiyasının da istifadəyə verilməsi nəzərdə tutulur.
