Oqtay Gülalıyevə açılmış cinayət işi xətm olunub
Siyasi Məhbuslarsız Azərbaycan İctimai Alyansının rəhbəri Oqtay Gülalıyevə 2012-ci ildə açılmış cinayət işi xətm olunub. “Azadlıq” radiosu oktyabrın 24-də hüquq müdafiəçisi Taleh Xasməmmədova istinadla belə xəbər yayıb. Məlumata görə, Oqtay Gülalıyevi Sabirabad Rayon Polis İdarəsinə dəvət edib ona 2012-ci ildə qaldırılmış cinayət işinə xitam verildiyini, ölkədən çıxışına qoyulan qadağanın aradan qaldırıldığını deyiblər.
Oqtay Gülalıyev “Kür” Vətəndaş Cəmiyyəti Qərargahının koordinatoru olan zaman, 2012-ci ilin aprel ayında Sabirabadda, çay daşqınından ziyan çəkmiş vətəndaşlarla görüş zamanı tutulmuşdu. Sabirabad Rayon Məhkəməsi Cinayət Məcəlləsinin 220.2-ci maddəsi ilə (hakimiyyət nümayəndəsinin tələblərinə fəal şəkildə müqavimət göstərmə və kütləvi iğtişaşlara, vətəndaşlara qarşı zorakılığa çağırış) ittiham olunan Oqtay Gülalıyev barəsində 2 aylıq həbs qətimkan tədbiri seçmiş, iyun ayında həbs qətimkan tədbiri ləğv edilmişdi.
