MMMC-lərin sayı 31-ə çatıb
Mənzil mülkiyyətçiləri müştərək cəmiyyətlərinin (MMMC) sayı açıqlanıb. İqtisadiyyat Nazirliyinin məlumatına görə, 2016-cı il oktyabrın 1-nə Bakı şəhərinin Yasamal rayonunda 8, Binəqədi rayonunda 6, Xətai rayonunda 5, Nərimanov rayonunda 3, Nəsimi və Səbail rayonlarının hər birində 4, Abşeron rayonunda 1 MMMC yaradılaraq dövlət qeydiyyatından keçib. Bununla da ölkə üzrə MMMC-lərin sayı 31-ə çatıb.
Rəsmi xəbərdə qeyd olunur ki, İqtisadiyyat Nazirliyi çoxmənzilli binalarda yeni idarəetmə üsullarının tətbiqinin dəstəklənməsi istiqamətində tədbirləri davam etdirir. Nazirliyin təşkilatçılığı ilə mütəmadi olaraq Bakıda və ölkənin digər şəhərlərində çoxmənzilli binaların sahə mülkiyyətçiləri ilə görüşlər keçirilir, onlara Mənzil Məcəlləsindən irəli gələn hüquq və vəzifələr, yeni idarəetmə metodlarının üstünlüyü barədə məlumat, habelə mənzil mülkiyyətçiləri müştərək cəmiyyətlərinin təşkili istiqamətində tövsiyələr verilir.
Sahə mülkiyyətçiləri arasında maarifləndirmə və təbliğat işlərinin təmin olunması, onların suallarının cavablandırılması, binalarda idarəetmənin təşkilinə yardım göstərilməsi məqsədilə yerli icra orqanlarının, eləcə də bələdiyyələrin təşkilatçılığı ilə Binəqədi, Nizami və Nəsimi rayonlarında, həmçinin Sumqayıt və Mingəçevir şəhərlərində maarifləndirmə mərkəzləri yaradılıb.
