Klinton Trampı 127 səs qabaqlayır
ABŞ prezidentliyinə Demokratlar Partiyasının namizədi Hillari Klinton Respublikaçılar Partiyasından rəqibi Donald Trampı 127 səs qabaqlayır.
Prezident seçkisi noyabrın 8-nə təyin olunub. Həmin gün seçicilər ştatların nümayəndələrindən ibarət 538 nəfərlik Seçicilər Kollegiyasının tərkibinə aydınlıq gətirəcək. Bundan ay yarım sonra dövlət başçısını Seçicilər Kollegiyası seçməli, prezidentin adı rəsmən 2017-ci il yanvarın 5-də açıqlanmalıdır.
Novator.az Abcnews.go.com-a istinadla bildirir ki, rəy sorğuları hazırda Hillari Klintonun 307 səs toplayacağını göstərir. Donald Trampın 180 səsi var. 51 səsin taleyi qeyri-müəyyəndir.
Prezident seçilmək üçün 270 səs kifayət edir.
Hillari Klinton seçicisi çox olan ştatlardan Kaliforniyada (55 seçici), Nyu-Yorkda (29), İllinoysda (20) üstündür, Donald Tramp isə Texasda (38) öndədir. Demokratlar Partiyasının namizədi Floridanın (29) səsini almağa da çox yaxındır.
