Kəndlilər Litvada hakimiyyətə gəldi
Litvada parlament seçkisinin ikinci turunun ilkin nəticələri açıqlanıb. Novator.az-ın məlumatına görə, oktyabrın 23-də dairələr üzrə keçirilmiş ikinci tur Kəndlilər və Yaşıllar İttifaqının qələbəsi ilə başa çatıb.
141 yerlik parlamentin 70 deputatı oktyabrın 9-da proporsional sistemlə seçilib. Həmin gün Xristian Demokratlar Partiyası 20, Kəndlilər və Yaşıllar İttifaqı 19, hakim Sosial Demokrat Partiyası 13, Liberallar Hərəkatı 8, Litva Polyakları və Xristian Ailələri İttifaqı 5, Qanun və Ədalət Partiyası 5 mandat əldə edib.
Majoritar sistemdə yarışın əsas hissəsi oktyabrın 23-də baş tutub. İlkin nəticələrə əsasən, Kəndlilər və Yaşıllar İttifaqı zəfər çalaraq mandatlarının sayını 56-ya çatdırıb. Xristian Demokratlar Partiyasının iki turun yekununda 31, Sosial Demokrat Partiyasının 17, Liberallar Hərəkatının 14, Qanun və Ədalət Partiyasının 9, Litva Polyakları və Xristian Ailələri İttifaqının 8 mandata sahib çıxdığı bildirilir. Qalan mandatlar bir neçə xırda partiyaya qismət olub.
