Moldova prezident seçkisinə 11 namizədlə gedir
Moldovada oktyabrın 30-da keçiriləcək prezident seçkisində 11 namizəd qüvvəsini sınayacaq. Novator.az-ın məlumatına görə, oktyabrın 21-də Mərkəzi Seçki Komissiyası Andrey Nestasenin imtina müraciətini nəzərə alaraq onu namizədlər siyahısından çıxarıb. Beləliklə, seçki günü bülletenlərdə 11 namizədin adı olacaq.
Ölkədə keçirilən son rəy sorğularına əsasən, Sosialist Partiyasının sədri İqor Dodon ən reytinqli namizəd sayılır. Onun ilk turda 27% səs alacağı güman olunur. Sağ qüvvələrin vahid namizədi Mayya Sandunun 9,3%, Demokrat Partiyasından Mariana Lupunun 7,5% səs yığacağı proqnozlaşdırılır.
Namizədliyini geri götürən Andrey Nestaseyə respondentlərin 8,1%-i dəstək verirdi. O, tərəfdarlarını prezident seçkisində Mayya Sanduya səs verməyə çağıracağını bəyan edib.
2000-ci ildən Moldovada prezidenti parlament seçib. Bu ildən prezidentin ümumxalq səsverməsi yolu ilə seçilməsi üsuluna qayıdılıb. Həmin sistemlə son prezident seçkisi 1996-cı ildə olub.
