Ermənistan parlamenti hökumət proqramına səs verdi
Ermənistan parlamenti oktyabrın 21-də yeni hökumətin proqramını təsdiqləyib. Novator.az-ın məlumatına görə, deputatların 85-i proqramın lehinə, 7-si əleyhinə səs verib, 6 nəfər bitərəf qalıb.
Proqramı parlamentdə baş nazir Karen Karapetyan təqdim edib. Sənəd 2017-ci ilin aprelində keçiriləcək parlament seçkisinə qədər görüləcək işləri nəzərdə tutur.
Ermənistanda yeni hökumətin yaradılması sentyabrın 13-də Karen Karapetyanın baş nazir təyin edilməsi ilə start götürüb, oktyabrın 3-də başa çatıb.
Karen Karapetyan 1963-cü ildə Azərbaycanın Dağlıq Qarabağ bölgəsində, Stepanakert şəhərində doğulub. İqtisad elmləri doktorudur. Uzun illər energetika sahəsində rəhbər vəzifələrdə çalışıb, 2010-2011-ci illərdə Yerevanın meri olub.
