Avropa İttifaqında zorakılıq qurbanı olan 62 milyon qadın var
Avropa İttifaqı ərazisində qadınların üçdəbiri fiziki və cinsi zorakılıqla üzləşir. Fundamental Hüquqlar üzrə Avropa Agentliyinin hesabatında belə deyilir.
Hesabat 42 min qadın arasında keçirilmiş sorğuya əsaslanır.
Novator.az xəbər verir ki, sorğu hazırda Avropa İttifaqı ölkələrində yaşayan 62 milyon qadının zorakılıq qurbanı olduğunu üzə çıxarıb. Bəlli olub ki, Avropada hər 10 qadından biri 15 yaşından sonra özünə qarşı seksual zorakılıq hiss edib, hər 20 qadından biri isə zorlanıb.
Qadınların 22 faizinə qarşı zorakılığı (fiziki və cinsi zorakılığı) öz partnyorları göstərib.
Sorğuda iştirak edən qadınların 67 faizi evdə ciddi zorakılıqla üzləşsə də, bu haqda polisə məlumat vermədiyini etiraf edib.
Fundamental Hüquqlar üzrə Avropa Agentliyinin hesabatında vurğulanır ki, zorakılığa məruz qalan qadınların əksəri haqda hüquq mühafizə orqanlarına məlumat verilmədiyi üçün rəsmi statistikalar reallığı əks etdirmir.
Agentlik qeyd edir ki, qadınlara qarşı zorakılıq ən çox Danimarkada baş verir. Bu ölkədə qadınların 52 faizi zorakılığa məruz qalır. Finlandiya (47 faiz) ikinci, İsveç (46 faiz) üçüncü yerdədir.
Qadınların zorakılığa ən az məruz qaldığı ölkə isə Polşadır (19 faiz).
