53 sahibkar 646 min manat güzəştli kredit aldı
İqtisadiyyat Nazirliyinin Sahibkarlığa Kömək Milli Fondu oktyabrın 20-si Samux rayonunda işgüzar forum keçirib. 90-a yaxın sahibkarın qatıldığı forumda çıxış edən Sahibkarlığa Kömək Milli Fondunun icraçı direktorunun müavini Arif Vəliməmmədov deyib ki, 2016-cı ildə sahibkarlıq subyektlərinin 1863 investisiya layihəsinə 123 milyon manat güzəştli kredit verilib. Onun sözlərinə görə, bu investisiya layihələri 5800-ə yaxın yeni iş yerinin yaradılmasına imkan açır.
Qeyd edilib ki, ümumilikdə indiyədək Gəncə-Qazax iqtisadi rayonunda fəaliyyət göstərən sahibkarlıq subyektlərinin 6000-dən çox investisiya layihəsinin maliyyələşdirilməsinə 223,7 milyon manat güzəştli kredit ayrılıb.
Economy.gov.az-ın məlumatında bildirilir ki, forum çərçivəsində Samux və ətraf rayonlarda fəaliyyət göstərən 53 sahibkar 646 min manat güzəştli kredit alıb. Kreditlər heyvandarlıq, arıçılıq, tərəvəzçilik, üzümçülük, bağçılıq və s. sahələrin inkişafına yönəldiləcək, 60-a yaxın yeni iş yerinin açılmasına imkan yaradacaq.
