Demoqrafik vəziyyətlə bağlı hesabat yayılıb
2016-cı ildə ölkə əhalisinin sayı 70,1 min nəfər və ya 0,7 faiz artaraq sentyabrın 1-nə 9 milyon 775,7 min nəfərə çatıb. Novator.az-ın məlumatına görə, Dövlət Statistika Komitəsi belə hesabat yayıb.
“Azərbaycanda demoqrafik vəziyyət” adlı hesabatda bildirilir ki, ölkə əhalisinin 53,1 faizi şəhər, 46,9 faizi kənd sakinlərinin, 49,8 faizi kişilərin, 50,2 faizi qadınların payına düşür. Hər 1000 nəfər kişiyə 1007 nəfər qadın düşür. Əhalinin 22,5 faizi 0-14 yaşda, 71,3 faizi 15-64 yaşda, 6,2 faizi isə 65 və yuxarı yaşdadır.
Ədliyyə Nazirliyinin rayon (şəhər) qeydiyyat şöbələri yanvar-avqust ayları ərzində ölkə üzrə 106,5 min, yaxud hər gün orta hesabla 436 doğulan körpə qeydə alıb. Doğulan körpələrin 53,4 faizi oğlan, 46,6 faizi isə qızdır. Doğulan körpələr üçün 75,2 yaş, o cümlədən oğlanlar üçün 72,7 yaş, qızlar üçün 77,6 yaş ömür uzunluğu gözlənir.
Yanvar-avqust ayları ərzində ölkədə 37,8 min ölüm halı qeydə alınıb.
2016-cı ilin 8 ayı ərzində 42,2 min nikah və 8,6 min boşanma rəsmiləşib.
Daxili İşlər Nazirliyi və Dövlət Miqrasiya Xidmətinin müvafiq qurumları yanvar-avqust ayları ərzində Azərbaycana daimi yaşamaq üçün 2622 nəfər gələn və 1205 nəfər ölkədən gedən qeydə alıb, miqrasiya saldosu müsbət 1417 nəfər təşkil edib.
