İlham Əliyev növbədənkənar seçki məsələsindən danışdı
Prezident İlham Əliyev Azərbaycanda növbədənkənar prezident seçkisi planlaşdırmadığını bəyan edib.
Novator.az-ın məlumatına görə, Rusiyanın “Sputnik” Beynəlxalq İnformasiya Agentliyinin suallarını cavablandıran dövlət başçısı deyib: “Prezident seçkisinin vaxtını dəyişmək niyyətimiz yoxdur. Azərbaycanda və xaricdə bu haqda nə söhbətlər getdiyini bilirəm. Amma prezident seçkisinin vaxtını dəyişmək planı yoxdur və buna ehtiyac da görmürəm”.
İlham Əliyev 2018-ci ildə keçiriləcək növbəti prezident seçkisində iştirak edib-etməyəcəyi barədə sualı belə cavablandırıb: “Qərar qəbul etmək üçün kifayət qədər vaxt var. Əhalinin indiki dəstəyini hiss etsəm, bu inamı doğrultmağa çalışacam”.
Sentyabrın 26-da Azərbaycanda konstitusiya referendumu keçirilib. Referendumun rəsmi nəticələrinə əsasən, prezidentin səlahiyyət müddəti 5 ildən 7 ilə artıb, dövlət başçısı növbədənkənar prezident seçkisi elan etmək hüququ alıb.
İlham Əliyev 2003-cü ildən Azərbaycanın prezidentidir.
