Azərbaycanın ən çox mal aldığı ölkə Rusiyadır
2016-cı ilin 9 ayında Azərbaycanın xarici ticarət dövriyyəsində əsas ölkə Türkiyə olub. Novator.az-ın məlumatına görə, Dövlət Gömrük Komitəsi bildirir ki, Türkiyə ilə ticarət dövriyyəsinin həcmi ümumi dövriyyənin 13,13 faizini təşkil edib.
İtaliya Azərbaycanın xarici ticarət tərəfdaşları arasında 11,34 faizlə ikinci, Rusiya 10,57 faizlə üçüncü ölkədir.
İxracda əsas ölkələrin siyahısına 18,22 faizlə İtaliya başçılıq edir. Türkiyə ikinci (12,88 faiz), Tayvan üçüncüdür (7,92 faiz).
Yanvar-sentyabr aylarında idxalda əsas ölkələrin ilk üçlüyü belə olub: Rusiya (17,67 faiz), Türkiyə (13,4 faiz), Çin (7,99 faiz).
Dövlət Gömrük Komitəsi yanvar-sentyabr ayları üzrə xarici ticarət göstəricilərini ötən gün açıqlayıb. Hesabata görə, 9 ayda Azərbaycanın xarici ticarətinin həcmi ötən ilə nisbətən 22,64% azalaraq 12 milyard 742,6 milyon ABŞ dolları olub.
Yanvar-sentyabr aylarında MDB ölkələri üzrə ixrac ötən ilin müvafiq dövrü ilə müqayisədə 25,93 faiz artıb. Avropa İttifaqı üzrə ixracda 43,2 faiz, digər ölkələr üzrə ixracda 26,98 faiz azalma olub.
2016-cı ilin 9 ayında MDB ölkələrindən idxal 2015-ci ilin müvafiq dövrü ilə müqayisədə 1,07 faiz artıb. Avropa İttifaqı ölkələri üzrə idxalda 12,49 faiz azalma var. Digər ölkələrdən idxal isə ötən ilin müvafiq dövrü ilə müqayisədə 4,96 faiz aşağı düşüb.
