Dövlət Miqrasiya Xidməti aylıq hesabat yayıb
Dövlət Miqrasiya Xidməti 2016-cı ilin sentyabr ayı ilə bağlı hesabat yayıb. Novator.az bildirir ki, hesabata görə, ötə ay 2908 əcnəbinin Azərbaycan Respublikasında olma, habelə müvəqqəti və daimi yaşamaq qaydalarına əməl etmədən inzibati qanunvericiliyin tələblərini pozması müəyyən edilib. Onlardan 15-nin sənədləri yenisi ilə əvəz olunub, 202 nəfərin ölkə ərazisində yaşamaları leqallaşdırılıb.
2109 əcnəbinin Azərbaycan ərazisini 48 saat ərzində tərk etmələri, 582 əcnəbinin isə inzibati qaydada ölkə hüdudlarından kənara çıxarılmaları barədə qərar qəbul edilib.
Ay ərzində əcnəbilər və vətəndaşlığı olmayan şəxslərdən ölkədə müvəqqəti olma müddətlərinin uzadılması, müvəqqəti və daimi yaşamaq üçün icazələrin verilməsi, vətəndaşlığa qəbul, xitam, bərpa, eləcə də vətəndaşlıq mənsubiyyətinin və qaçqın statusunun müəyyənləşdirilməsi, həmçinin əmək fəaliyyətinin həyata keçirilməsi üçün iş icazələrinin verilməsi və mövcud iş icazələrinin müddətlərinin uzadılması ilə bağlı 9148 müraciət daxil olub.
Olduğu yer üzrə qeydiyyatla bağlı 67648 əcnəbinin müraciəti qeydə alınıb.
