Azərbaycan iqtisadiyyatı 9 ayda
Dövlət Statistika Komitəsi 2016-cı ilin yanvar-sentyabr ayları üzrə ümumi daxili məhsul (ÜDM) hesabatı açıqlayıb. Novator.az-ın məlumatına görə, hesabatda qeyd olunur ki, 2016-cı ilin doqquz ayında ölkədə 43 milyard 436,3 milyon manat və ya əhalinin hər nəfərinə 4512,5 manat dəyərində ümumi daxili məhsul istehsal edilib. ÜDM-in 65,7 faizi iqtisadiyyatın qeyri-neft sahələrinin, 34,3 faizi isə neft-qaz sektorunun payına düşüb.
Hesabat dövründə informasiya və rabitə sahələrində əlavə dəyər istehsalı əvvəlki ilin müvafiq dövrü ilə müqayisədə 5,5 faiz, kənd təsərrüfatı, meşə təsərrüfatı və balıqçılıq sahələrində 2,4 faiz, ticarət; nəqliyyat vasitələrinin təmiri sahələrində 2,3 faiz, turistlərin yerləşdirilməsi və ictimai iaşə sahələrində 1,8 faiz, sənayedə 1 faiz artıb.
Tikintidə 32 faiz, nəqliyyat və anbar təsərrüfatı sahələrində 1,2 faiz, iqtisadiyyatın digər sahələrində isə 2,5 faiz azalma qeydə alınıb.
Rəsmi açıqlamaya əsasən, tikinti sektorunda istehsalın düşməsi cari ilin yanvar-sentyabrında ümumi daxili məhsulun əvvəlki ilin eyni dövrünə nisbətən 3,9 faiz azalmasına təsir edən əsas amil olub.
