Yarım milyard manatdan çox büdcə kəsiri var
Maliyyə Nazirliyi dövlət büdcəsinin 2016-cı ilin doqquz ayı üzrə icrasına dair məlumat yayıb. Novator.az bildirir ki, hesabata görə, doqquz ayda dövlət büdcəsinin mədaxili 10 milyard 103,1 milyon manat, xərcləri 10 milyard 622,2 milyon manat olub, 519,1 milyon manat məbləğində büdcə kəsiri (defisit) yaranıb.
Dövlət büdcəsinin mədaxili 12 milyard 98,3 milyon manat proqnoza qarşı 10 milyard 103,1 milyon manat və ya 16,5 faiz az icra olunub.
2016-cı ilin doqquz ayında dövlət büdcəsinin xərcləri proqnoza nisbətən 87,5 faiz və ya 10 milyard 622,2 milyon manat icra edilib. Dövlət büdcəsi xərclərinin 42,5 faizi sosial yönlü xərclərin (əməyin ödənişi fondu, təqaüd və sosial müavinətlər, dərman və ərzaq xərcləri) maliyyələşdirilməsinə yönəldilib.
İcmal büdcənin gəlirləri 14 milyard 951 milyon manat, icmal büdcənin xərcləri isə 12 milyard 623,4 milyon manat olub. Büdcə artıqlığı 2 milyard 327,6 milyon manat təşkil edib.
