Orta pensiya 190 manatı ötüb
Əmək və Əhalinin Sosial Müdafiəsi Nazirliyində 2016-cı ilin 9 ayında görülən işlərin yekunlarına dair kollegiya iclası keçirilib. Rəsmi məlumata görə, nazir Səlim Müslümov iclasda əmək pensiyaçılarının və aztəminatlı təbəqələrin sosial müdafiəsinin gücləndirilməsi tədbirlərinə toxunub: “Cari ilin yanvar-sentyabr aylarında Dövlət Sosial Müdafiə Fondunun xərcləri 2 milyard 370,43 milyon manat olub, bunun da 2 milyard 327,07 milyon manatı və yaxud 98,17 faizi əhaliyə ödənişlərə yönəldilib. Əmək pensiyaları ilə bağlı xərclər 2 milyard 261 milyon manat, məcburi dövlət sosial sığorta haqları hesabına ödənilən müavinətlərin məbləği isə 66,07 milyon manat təşkil edib.
Yanvarın 1-dən bütün növ əmək pensiyalarının sığorta hissəsinə artım tətbiq olunub. Həmçinin yaşa görə əmək pensiyasının baza hissəsinin məbləği 2016-cı ilin fevralın 1-dən 10 faiz artırılaraq 110 manata çatdırılıb və müvafiq sərəncam 1 milyon 223 min pensiyaçıya şamil olunub. Əmək pensiyaçıları sırasından güzəştli kateqoriyaya aid olan şəxslərin əmək pensiyalarının baza hissəsinə 10 manatdan yuxarı, yəni 11 manatdan 25 manata qədər artım tətbiq edilib. Ümumilikdə ölkədə əmək pensiyalarının orta aylıq məbləği 2016-cı ilin əvvəlinə nisbətən 7 faiz artaraq 190,1 manata, o cümlədən yaşa görə əmək pensiyalarının orta aylıq məbləği 211,07 manata çatıb”.
Nazir bildirib ki, ölkə üzrə əmək pensiyaçılarının sayı oktyabrın 1-nə 1 milyon 312 min nəfər olub.
Məlumat verilib ki, 2016-ci ilin doqquz ayı ərzində ölkə əhalisinin 4,7 faizinə və ya 458 min 838 nəfərə aylıq və birdəfəlik sosial müavinət təyin olunub və ödənilib. 57 min 389 nəfər prezident təqaüdləri ilə təmin olunub. Sosial müavinət və təqaüdlərin orta aylıq məbləğində 2016-cı ilin əvvəlinə nisbətən 9,6 faiz artım qeydə alınıb.
