Antonio Quterreş BMT-nin baş katibi oldu
BMT Baş Məclisi oktyabrın 13-də Təhlükəsizlik Şurasının təqdimatına baxaraq quruma yeni baş katib seçib. Baş katib postunu yeganə namizəd olan portuqaliyalı Antonio Quterreş tutub.
Antonio Quterreş BMT-nin 9-cu baş katibi olaraq 2017-ci il yanvarın 1-dən vəzifəsinin icrasına başlayacaq. O, səlahiyyət müddəti dekabrın 31-də başa çatan koreyalı Pan Gi Munu əvəzləyəcək.
1949-cu ildə Lissabonda doğulan Antonio Quterreş Portuqaliya Sosialist Partiyasının baş katibi olub, ölkəsində baş nazir postunu tutub, Sosialist İnternasionalına, Avropa İttifaqı Şurasına başçılıq edib və BMT-nin qaçqınlar üzrə ali komissarı vəzifəsində çalışıb. İngilis, ispan, fransız dillərini bilir.
Novator.az bildirir ki, Pan Gi Muna qədər BMT-nin baş katibi postunu bu şəxslər tutub: Trüqve Li, Daq Hammerşeld, U Tan, Kurt Valdhaym, Havyer Peres de Kuelyer, Butros Butros-Qali, Kofi Annan.
