Prezident konstitusiyadakı yeniliklərlə bağlı sərəncam imzalayıb
Prezident İlham Əliyev 26 sentyabr referendumunda qəbul edilmiş konstitusiya dəyişikliklərinin qüvvəyə minməsi ilə əlaqədar müvafiq hüquqi aktların layihələrinin hazırlanmasına sərəncam verib. Oktyabrın 12-də imzalanmış sərəncamla Nazirlər Kabinetinə altı ay müddətində dəyişikliklərdən irəli gələn hüquqi aktların layihələrini hazırlamaq tapşırılıb.
Dövlət başçısının göstərişinə əsasən, Nazirlər Kabinetinin və mərkəzi icra hakimiyyəti orqanlarının normativ hüquqi aktları, mərkəzi icra hakimiyyəti orqanlarının normativ xarakterli aktları dəyişikliklərə uyğunlaşdırılmalıdır.
Azərbaycan Konstitusiyasında dəyişikliklər haqqında referendum aktına əsasən, ana qanunda prezident seçilmək, baş nazir təyin edilmək, hakim olmaq, deputat mandatı almaq, nazir postu tutmaq üçün yaş senzi aradan qaldırılır, prezidentin səlahiyyət müddəti 5 ildən 7 ilə artır, dövlət başçısı növbədənkənar prezident seçkisi elan etmək, parlamenti buraxmaq hüququ alır.
Başqa bir əsas yenilik vitse-prezident postlarının təsisini nəzərdə tutur. Birinci vitse-prezidenti və vitse-prezidentləri Azərbaycan prezidenti vəzifəyə təyin və vəzifədən azad edir, növbədənkənar prezident seçkisi zamanı dövlət başçısının səlahiyyətləri birinci vitse-prezidentə keçir.
