Neft Fondu gəlirini açıqlayıb
2016-cı ilin yanvar-sentyabr aylarında Dövlət Neft Fondunun büdcə gəlirləri 6 milyard 618,6 milyon manat, büdcə xərcləri isə 3 milyard 823,1 milyon manat olub. AZƏRTAC-ın məlumatına görə, bunu fondun icraçı direktoru Şahmar Mövsümov bəyan edib.
Şahmar Mövsümov deyib ki, yanvar-sentyabr aylarında neft və qaz sazişlərinin həyata keçirilməsindən 5 milyard 883,8 milyon manat, o cümlədən mənfəət neftinin və qazın satışından 5 milyard 867 milyon manat gəlir götürülüb.
Fondun vəsaitinin idarə olunmasından əldə edilən gəlirlər 734,8 milyon manata bərabər olub, valyuta məzənnələrinin dəyişməsindən yaranan fərqlə bağlı büdcədənkənar gəlir 2 milyard 612,3 milyon manat təşkil edib.
Bu il oktyabrın 1-nə Dövlət Neft Fondunun aktivləri cari ilin əvvəlinə (33 milyard 574,1 milyon ABŞ dolları) nisbətən 6,7 faiz artaraq 35 milyard 822,1 milyon ABŞ dollarına çatıb.
