Azərbaycan Konstitusiyası dəyişdi
Mərkəzi Seçki Komissiyası 11 oktyabr iclasında Azərbaycan Konstitusiyasına əlavə və dəyişikliklər referendumunun nəticələrini təsdiqləyib. Novator.az-ın məlumatına görə, bununla ümumxalq səsverməsinə yekun vurulub. Referendum yolu ilə qəbul edilmiş akt dərc edildiyi gündən qüvvəyə minir.
Sentyabrın 26-da keçirilmiş referendumun nəticələrinə əsasən, ana qanunda prezident seçilmək, baş nazir təyin edilmək, hakim olmaq, deputat mandatı almaq, nazir postu tutmaq üçün yaş senzi aradan qaldırılır, prezidentin səlahiyyət müddəti 5 ildən 7 ilə artır, dövlət başçısı növbədənkənar prezident seçkisi elan etmək, parlamenti buraxmaq hüququ alır.
Başqa bir əsas yenilik vitse-prezident postlarının təsisini nəzərdə tutur. Birinci vitse-prezidenti və vitse-prezidentləri Azərbaycan prezidenti vəzifəyə təyin və vəzifədən azad edir, növbədənkənar prezident seçkisi zamanı dövlət başçısının səlahiyyətləri birinci vitse-prezidentə keçir.
