Vergilər Nazirliyi 9 aylıq hesabat açıqlayıb
Vergilər Nazirliyi 9 aylıq hesabat açıqlayıb. Qeyd olunur ki, 2016-cı ilin yanvar-sentyabr aylarında Vergilər Nazirliyinin xətti ilə dövlət büdcəsinə 4 milyard 926 milyon 185 min manat vəsait gəlib, proqnoz tapşırığına 100,2 faiz əməl edilib.
Hesabata görə, Dövlət Neft Şirkəti büdcə qarşısındakı vergi öhdəliklərinə 100,6 faiz əməl etsə də, hasilatın pay bölgüsü üzrə proqnoz tapşırığı kəsirlə, 82 faiz icra olunub.
Qeyri-neft-qaz sektoru üzrə büdcəyə 3 milyard 843 milyon 651,9 min manat vəsait daxil olub, proqnoz tapşırığına 101,7 faiz əməl edilib. Bu, ötən ilin müvafiq dövrü ilə müqayisədə 365 milyon 967,9 min manat və ya 10,5 faiz çoxdur.
Hesabat dövründə 89 101 vergi ödəyicisi qeydiyyata alınıb. 1 oktyabr 2016-cı ilə qeydiyyatda olan vergi ödəyicilərinin sayı 739 297 olub, bu da 2015-ci ilin 1 oktyabrına qeydiyyatda olan vergi ödəyicilərinin sayından 12,2 faiz çoxdur.
Novator.az bildirir ki, 2016-cı il üçün dövlət büdcəsinin gəlirləri 16 milyard 822 milyon manat proqnozlaşdırılır. Vergilər Nazirliyinin xətti ilə dövlət büdcəsinə 7 milyard 10 milyon manat daxilolma nəzərdə tutulur.
