İqtisadi fəaliyyətlə bağlı yeni sənədlər
Prezident İlham Əliyev iqtisadi fəaliyyətlə bağlı fərman və sərəncam imzalayıb. Fərman “Xarici ölkələrə ixrac missiyalarının təşkilinə, xarici bazarların araşdırılması və marketinq fəaliyyətinə, “Made in Azerbaijan” brendinin xarici bazarlarda təşviqinə, yerli şirkətlərin ixracla bağlı xarici ölkələrdə sertifikat və patentlər almasına, ixracla əlaqəli tədqiqat-inkişaf proqram və layihələrinə çəkilən xərclərin dövlət büdcəsi hesabına ödənilən hissəsinin müəyyənləşdirilməsi və ödənilmə mexanizminin tənzimlənməsi qaydası”nın təsdiqini nəzərdə tutur. Qaydada nəzərdə tutulmuş dəstək tədbirlərinin maliyyələşdirilməsi üçün 2016-cı ilin dövlət büdcəsindən, prezidentin ehtiyat fondundan İqtisadiyyat Nazirliyinə 3 milyon manat ayrılır.
Dövlət başçısı həmçinin “Azərbaycan mənşəli qeyri-neft məhsullarının ixracının stimullaşdırılması ilə bağlı görülmüş işlər barədə hesabat”ın formasını təsdiq edib (Hesabat). İqtisadiyyat Nazirliyinə bir çox iş, o cümlədən ixrac olunan məhsullar barədə hesabatı Dövlət Gömrük Komitəsi ilə birlikdə üç ayda bir dəfə prezidentə təqdim etmək tapşırılıb.
Novator.az-ın məlumatına görə, İlham Əliyevin oktyabrın 5-də imzaladığı sərəncam isə tütünçülüyün inkişafına dövlət dəstəyini gücləndirmək məqsədi daşıyır. Sərəncama əsasən, emal müəssisələrinə satılmış quru tütünün hər kiloqramına, yaş tütünün isə hər 10 kiloqramına görə tütün istehsalçılarına 5 qəpik məbləğində subsidiya veriləcək. Subsidiya 2016-cı ildə istehsal olunub emal müəssisələrinə satılmış quru və yaş tütünə də şamil edilir.
