Əmək və Əhalinin Sosial Müdafiəsi Nazirliyi müraciət statistikası yayıb
Sentyabr ayında Əmək və Əhalinin Sosial Müdafiəsi Nazirliyinin 142 və 190 çağrı mərkəzlərinə vətəndaşlardan 17043 müraciət daxil olub. Rəsmi hesabata görə, müraciətlərin 96 faizi və ya 16301-i sorğu xarakterli olub, həmin müraciətlərlə əlaqədar vətəndaşlara hüquqi izahatlar verilib. Digər müraciətlər nazirliyin müvafiq struktur bölmələrində araşdırılıb və nəticəsinə uyğun tədbirlər görülüb.
Ötən ay çağrı mərkəzlərinə edilən müraciətlərin 30,2 faizi sosial təminat, 11,8 faizi əmək qanunvericiliyi, 18,6 faizi nazirliyin elektron xidmətlərindən istifadə, 5,3 faizi tibbi-sosial ekspertiza və əlilliyi olan şəxslərin reabilitasiyası, 9,7 faizi məşğulluğun təminatı məsələlərinə aid olub. Müraciətlərin 2,6 faizi fərdi uçotun təşkili, 9,6 faizi pensiya və müavinətlər, 7,9 faizi məcburi dövlət sosial sığorta, 4,3 faizi avtomatlaşdırılmış pensiya təyinatı məsələlərini əhatə edib.
142 və 190 çağrı mərkəzlərinə daxil olan müraciətlərin sayı avqust ayı ilə müqayisədə 7,7 faiz azalıb.
