Qarabağda doğulmuş general Baş Qərargaha rəis gətirildi
Ermənistan Silahlı Qüvvələri Baş Qərargahının rəisi dəyişib. Novator.az-ın məlumatına görə, oktyabrın 3-də prezident Serj Sərkisyan Yuri Xaçaturovu Baş Qərargahın rəisi vəzifəsindən azad edib. Digər sərəncamla o, Milli Təhlükəsizlik Şurasının katibi təyin edilib.
Milli Təhlükəsizlik Şurasının katibi postundan azad edilən Armen Gevorkyan isə Prezident Administrasiyasının rəhbəri postuna təyinat alıb.
Silahlı Qüvvələrin Baş Qərargahının rəisi vəzifəsi general-leytenant Movses Akopyana həvalə olunub.
Movses Akopyan 1965-ci ildə Azərbaycanın Dağlıq Qarabağ bölgəsində, indiki Xocavənd rayonunda anadan olub. Almatı Ümumqoşun Komanda Məktəbini bitirib.
1988-ci ildən SSRİ Silahlı Qüvvələrinin Xankəndidəki 366-cı alayında, 1992-ci ildən Dağlıq Qarabağ separatçılarının ordusunda qulluq edib. Azərbaycan torpaqlarının işğalının və soyqırımı cinayətlərinin iştirakçısıdır. 2007-ci ildən işğalçı rejimin “müdafiə naziri” olub. 2015-ci ildən Ermənistan Silahlı Qüvvələri Baş Qərargahı rəisinin mavini postunu tutub. 20 may 2016-cı ildən müdafiə nazirinin müavini idi.
Oktyabrın 3-də Ermənistana yeni müdafiə naziri təyin edilib: Vigen Sərkisyan. 41 yaşlı Vigen Sərkisyan bu təyinata qədər Prezident Administrasiyasının rəhbəri vəzifəsində çalışırdı.
2008-ci ildən müdafiə naziri Seyran Ohanyan idi. O, Azərbaycan torpaqlarının işğalının və soyqırımı cinayətlərinin rəhbərlərindən biridir. 1999-cu il avqustun 2-dən “DQR”in “müdafiə naziri” olub. 2007-ci ilin may ayından Ermənistan Silahlı Qüvvələri Baş Qərargahının rəisi postunu tutub.
