Ermənistanda yeni müdafiə naziri
Oktyabrın 3-də Ermənistan prezidenti Serj Sərkisyan Vigen Sərkisyanı müdafiə naziri təyin edib.
Novator.az-ın məlumatına görə, Vigen Sərkisyan bu təyinata qədər Prezident Administrasiyasının rəhbəri postunu tuturdu.
Vigen Sərkisyan 1975-ci il mayın 10-da anadan olub. Sankt-Peterburq Mülki Xidmət Akademiyasını, Yerevan Dövlət Universitetini və Filetser Hüquq və Diplomatiya Məktəbini (ABŞ) bitirib.
1995-1998-ci illərdə Ermənistan parlamenti sədrinin köməkçisi, 2003-2009-cu illərdə Ermənistan prezidentinin köməkçisi, 2009-2011-ci illərdə Prezident Administrasiyası rəhbərinin müavini olub. 2011-ci ildən Prezident Administrasiyasına rəhbərlik edib.
2000-2003-cü illərdə müdafiə nazirinin referenti kimi hərbi xidmət keçib.
2016-cı il sentyabrın 8-də Ermənistanın baş naziri Ovik Abramyan istefa verib. Sentyabrın 13-dən hökumətə Karen Karapetyan baş nazirlik edir. Baş nazir dəyişdiyi üçün Ermənistan hökuməti yenilənir.
Köhnə hökumətdə müdafiə naziri Seyran Ohanyan idi.
Seyran Ohanyan 1962-ci ildə Azərbaycanın Şuşa şəhərində anadan olub. 1983-cü ildə Bakı Ali Ümumqoşun Komandirləri Məktəbini bitirib. 1988-ci ilə qədər sovet ordusunun Almaniya Demokratik Respublikasındakı hissələrindən birində xidmət edib. Həmin il Zaqafqaziya Hərbi Dairəsinə keçirilib. 1992-ci ilin aprelinə qədər Xankəndidəki motoatıcı alayda xidmət edən Seyran Ohanyan sonra separatçı ordunun sıralarına qoşulub. Azərbaycan torpaqlarının işğalının və soyqırımı cinayətlərinin rəhbərlərindən biridir.
1999-cu il avqustun 2-dən “DQR”in “müdafiə naziri” olub. 2007-ci ilin may ayından Ermənistan Silahlı Qüvvələrinin baş qərargah rəisi postunu tutub. Müdafiə naziri postuna 2008-ci ildə təyinat alıb.
