Edvard Nalbandyan xarici işlər naziri postunda qaldı
Ermənistan prezidenti Serj Sərkisyan oktyabrın 3-də Edvard Nalbandyanı yenidən xarici işlər naziri təyin edib.
Novator.az bildirir ki, 1956-cı ildə Ermənistanda anadan olan Edvard Nalbandyan 1978-ci ildə Moskva Dövlət Beynəlxalq Əlaqələr İnstitutunu, 1988-ci ildə SSRİ Milli Elmlər Akademiyası Şərqşünaslıq İnstitutunun aspiranturasını bitirib.
1978-1983-cü illərdə SSRİ-nin Liviya səfirliyində, 1983-1986-cı illərdə SSRİ Xarici İşlər Nazirliyində çalışıb. 1986-1992-ci illərdə Misir səfirliyində (əvvəl SSRİ, sonra Rusiyanın) müşavir vəzifəsində çalışıb.
1992-ci ildən Ermənistanı Misirdə, Mərakeşdə, Omanda təmsil edib. 1999-cu ildən Fransada səfir olub. Xarici işlər naziri postuna 2008-ci ildə gətirilib.
2016-cı il sentyabrın 8-də Ermənistanın baş naziri Ovik Abramyan istefa verib. Sentyabrın 13-dən hökumətə Karen Karapetyan baş nazirlik edir. Baş nazir dəyişdiyi üçün Ermənistan hökumətinin yenilənməsinə start verilib və oktyabrın 3-də proses başa çatıb.
