Şəhid ailələrinə yeni evlər verilib
Əmək və Əhalinin Sosial Müdafiəsi Nazirliyinin Astara rayonunda inşa etdirdiyi 4 fərdi yaşayış evi şəhid ailələrinin istifadəsinə verilib. Sentyabrın 30-da yayılan rəsmi məlumata görə, evlərin təqdim olunması tədbirlərində Əmək və Əhalinin Sosial Müdafiəsi Nazirliyinin, Astara Rayon İcra Hakimiyyətinin, yerli ictimaiyyətin nümayəndələri iştirak edib.
Dövlət Sosial Müdafiə Fondunun direktor müavini Səfər Mehdiyev çıxışında deyib ki, bu il 241 nəfərin, o cümlədən 152 nəfər Qarabağ müharibəsi əlilinin, 89 şəhid ailəsinin yeni mənzillərlə təminatı həyata keçirilib.
Prezidentin 20 iyun 2014-cü il sərəncamı yerli icra hakimiyyəti orqanlarında növbəyə dayanmış 5731 nəfər şəxsin və şəhid ailəsinin 2018-ci ilədək mərhələlərlə mənzil və ya fərdi evlə təmin edilməsini nəzərdə tutur.
