Şura sədri: “Təhsildən yayınırlar”. Nazir müavini: “Nazirlik mexanizmə malik deyil”
“Orta məktəblərin buraxılış sinif şagirdlərinin dərsə davamiyyəti ilə bağlı 2012-ci ildən aparılan statistik təhlilin nəticələri göstərir ki, I sinfə gedən şagirdlərin bir qisminin adları IX siniflərin məlumat bazalarında aşkar edilmir, yəni onlar icbari təhsildən yayınırlar”. Novator.az xəbər verir ki, Dövlət İmtahan Mərkəzinin Direktorlar Şurasının sədri Məleykə Abbaszadə şuranın sentyabr ayının sonunda keçirilən iclasında belə deyib.
Məleykə Abbaszadə bildirib ki, bu, sosioloji problemdir və onun aradan qaldırılması məqsədilə məktəblərdə, eləcə də valideynlərlə ciddi iş aparılmalıdır.
İclas iştirakçıları müzakirələr zamanı vurğulayıblar ki, bu, təkcə hansısa bir qurumun deyil, bütün cəmiyyətin qarşısında duran vacib məsələlərdəndir. Məleykə Abbaszadə iclasda təhsil nazirinin müavini Ceyhun Bayramova müraciət edərək, Tələbə Qəbulu üzrə Dövlət Komissiyasının hər il hazırladığı və ölkə rəhbərliyinə təqdim olunan hesabatda nəzərə alınması üçün sözügedən məsələyə dair Təhsil Nazirliyində olan məlumatların təqdim olunmasını xahiş edib.
Ceyhun Bayramov iclasda başqa bir statistik təhlilin nəticələrini də diqqətə çatdırıb. O deyib ki, məktəbə 1 il və daha artıq gec gedənlərin sayı da az deyil. Ceyhun Bayramov vurğulayıb ki, Təhsil Nazirliyi bununla bağlı hər hansı təsir mexanizminə malik deyil: “Lakin məsələyə ötən illərlə müqayisə prizmasından yanaşsaq görərik ki, müsbət dinamika mövcuddur, yəni belə uşaqların sayı ildən-ilə azalır. Ümumiyyətlə, Təhsil Nazirliyinin yanaşması ondan ibarətdir ki, hər hansı bir problem barədə danışdıqda onun dinamikasını müşahidə etmək daha məqsədəuyğundur”.
