Hökumət mediaya ayrılan vəsaiti azaldır
2017-ci il dövlət büdcəsi haqqında qanun layihəsində radio, televiziya və nəşriyyat xərclərinə 63 milyon 81 min 310 manat ayrılması nəzərdə tutulub. Novator.az bildirir ki, bu, 2016-cı ilin dövlət büdcəsi ilə müqayisədə 4 milyon 537 min 549 manat azdır.
2016-cı ilin dövlət büdcəsində radio, televiziya və nəşriyyat işinə 66 milyon 916 min 442 manat ayırmaq nəzərdə tutulub. Ancaq mart ayında büdcə yenilənib, radio, televiziya və nəşriyyat işinə ayrılan vəsait 67 milyon 618 min 859 manata yüksəlib.
2016-cı ilin büdcəsində AZƏRTAC üçün 7 milyon 785 min 171 manat, Milli Televiziya və Radio Şurası üçün 793 min 837 manat, “Azərbaycan Televiziya və Radio Verilişləri” Qapalı Səhmdar Cəmiyyəti üçün 37 milyon 720 min 320 manat, İctimai Televiziya və Radio Yayımları Şirkəti üçün 16 milyon 552 min 800 manat, “Azərbaycan” nəşriyyatı üçün (dövlət sifarişlərinin yerinə yetirilməsinə), 1 milyon 3 min 200 manat, Kütləvi İnformasiya Vasitələrinin İnkişafına Dövlət Dəstəyi Fondu üçün 4 milyon 12 min 800 manat nəzərdə tutulub. “Mir” Dövlətlərarası Teleradio Şirkətinin Azərbaycan milli nümayəndəliyinə verilən subsidiya 521 min 664 manatdır, radio və televiziya redaksiyalarının saxlanılması üçün isə 22 min 904 manat ayrılıb.
