Azərbaycan nefti 3 dollar 15 sent bahalaşıb
Sentyabrın 30-u dünya birjalarında neftin qiyməti müxtəlif istiqamətlərdə dəyişib. Nyu-York birjasında “Layt” markalı neftin bir barrelinin qiyməti 0,28 dollar azalaraq 45,75 dollar, London birjasında “Brent” markalı neftin bir barrelinin qiyməti 0,36 dollar artaraq 47,24 dollar olub.
AZƏRTAC xəbər verir ki, “AzəriLayt” markalı neftin bir barreli 3,15 dollar bahalaşaraq 50,04 dollara qalxıb. Bu, büdcə qiymətindən 25 dollardan çox yuxarı qiymətdir. Azərbaycanın dövlət büdcəsində xam neftin satış qiyməti bir barrel üçün 25 ABŞ dolları götürülüb.
Neft ixrac edən 14 ölkəni (Səudiyyə Ərəbistanı, İran, İraq, Küveyt, Birləşmiş Ərəb Əmirlikləri, Qətər, İndoneziya, Əlcəzair, Liviya, Nigeriya, Qabon, Anqola, Ekvador, Venesuela) birləşdirən OPEK-in 28 sentyabr razılaşmasına əsasən, gündəlik neft hasilatı 32,5-33 milyon barrel həcminə salınır. Hazırda hasilatın həcmi 33,24 milyon barreldir.
OPEK neft hasilatının həcmini azaltmaları üçün Rusiyaya və digər istehsalçı ölkələrə də çağırış edib.
