Səhiyyə reytinqi: Azərbaycan 55 ölkə arasında 53-cüdür
Bloomberg.com səhiyyə reytinqi açıqlayıb. Reytinq orta ömür uzunluğu və səhiyyəyə dövlətin ayırdığı vəsait meyarlarına əsaslanır.
Novator.az-ın məlumatına görə, Azərbaycan 55 ölkənin yer aldığı siyahıda 53-cü sıradadır. Ölkədə orta ömür uzunluğunun 70,76 il olduğu, büdcədən səhiyyəyə ümumi daxili məhsulun (ÜDM) 6,04 faizi həddində vəsait ayrıldığı qeyd edilir.
Reytinq cədvəlinin başında Honkonq dayanır. Ölkədə orta ömür uzunluğu 83,98 ildir, büdcədən səhiyyəyə ÜDM-in 5,4 faizi məbləğində vəsait ayrılır.
İkinci pillədə Sinqapur (orta ömür 82,65 ildir, büdcədən səhiyyəyə ÜDM-in 4,92 faizi həcmində vəsait ayrılır), üçüncü pillədə İspaniya (orta ömür 83,80 ildir, büdcədən səhiyyəyə ÜDM-in 9,03 faizi həcmində vəsait ayrılır) gəlir.
Türkiyə siyahıda 25-ci yerdədir: orta ömür uzunluğu 75,16 il, səhiyyəyə dövlət büdcəsindən ayrılan vəsait ÜDM-in 5,41 faizi həcmində.
İran 30-cu yerdə qərar tutur. Ölkədə orta ömür uzunluğunun 75,39 il, səhiyyəyə dövlət büdcəsindən ayrılan vəsaitin ÜDM-in 6,89 faizi həcmində olduğu bildirilir.
Rusiya 55 ölkə arasında sonuncu pillədədir. Ölkədə orta ömür göstəricisi 70,37 il, səhiyyəyə dövlət büdcəsindən ayrılan vəsait ÜDM-in 7,07 faizi həddindədir.
Qazaxıstan siyahıda 45-ci yerdə qərarlaşır (orta ömür göstəricisi 71,62 il, səhiyyəyə dövlət büdcəsindən ayrılan vəsait ÜDM-in 4,36 faizi həcmində).
