OPEK neft hasilatını azaltmağa qərar verdi
Neft ixrac edən ölkələri birləşdirən OPEK üzvlərinin sentyabrın 28-i Əlcəzairdə keçirilən qeyri-rəsmi görüşündə hasilatın azaldılması barədə razılıq əldə olunub. Razılaşmaya əsasən, üzv ölkələr gündəlik neft hasilatını 32,5-33 milyon barrel həcminə salır. Hazırda hasilatın həcmi 33,24 milyon barreldir.
AZƏRTAC-ın məlumatına görə, hər bir üzv ölkənin gündəlik neft hasilatının həcmini dəqiqləşdirmək üçün noyabr ayında keçiriləcək rəsmi görüşdə danışıqlar aparılacaq. OPEK neft hasilatının həcmini azaltmaları üçün Rusiyaya və digər istehsalçı ölkələrə də çağırış edib.
1960-cı ildə yaradılmış OPEK-in 14 üzvü var: Səudiyyə Ərəbistanı, İran, İraq, Küveyt, Birləşmiş Ərəb Əmirlikləri, Qətər, İndoneziya, Əlcəzair, Liviya, Nigeriya, Qabon, Anqola, Ekvador, Venesuela.
Ötən gün Nyu-York birjasında “Layt” markalı neftin bir barreli 46,03 dollara, London birjasında “Brent” markalı neftin bir barreli 47,60 dollara satılıb. “AzəriLayt” markalı neftin bir barreli isə 46,46 dollara təklif edilib.
Novator.az bildirir ki, iki il əvvəl – 2014-cü il sentyabrın 30-da “Layt”ın bir barreli 94,57 dollar, “Brent”in bir barreli 97,2 dollar, “AzəriLayt”ın bir barreli 97,63 dollar olub.
