Barak Obama niyə “islam terrorizmi” ifadəsini işlətmədiyini başa salıb
ABŞ prezidenti Barak Obama “islam terrorizmi” ifadəsini niyə bəyənmədiyini və bu tipli ifadələri niyə işlətmədiyini izah edib.
Novator.az-ın məlumatına görə, sentyabrın 28-də hərbçilərlə görüşündə Obama deyib: “Siz bu təşkilatın (İŞİD-i nəzərdə tutur – red.) üzvlərini “islam terrorçuları” adlandırsanız, dünyadakı bütün dostlarımız, müttəfiqlərimiz həmin ifadəni hansısa mənada “islam – terrorizm deməkdir” kimi qəbul edə bilər. Bu isə tərəfdaşlarımızın özlərini zərbə altında hiss etməsinə gətirib çıxarar. Nəticədə ABŞ terrorizmlə mübarizədə həmin ölkələrdən dəstək almaqda çətinlik çəkər”.
ABŞ prezidenti vurğulayıb ki, hakimiyyət belə ifadələrdən istifadə etməyə, ölkədə yaşayan “müsəlmanları yoxlamağa” və ya onların hüquqlarını şübhə altına almağa başlasa, çox sürüşkən yolla addımlamış olar: “Bu, çox təhlükəlidir. Çünki bu bizi – amerikalıları ölkə kimi parçalayır”.
Barak Obama “islam terrorizmi” ifadəsini terrorizmlə effektiv mübarizəyə maneə saydığını, ona görə də belə ifadələrin əleyhinə olduğunu vurğulayıb.
Qeyd edək ki, bəzi rəqibləri, o cümlədən rəqib partiyadan (Respublikaçılar Partiyası) ABŞ prezidentliyinə namizəd Donald Tramp “islam terrorizmi”, “radikal islam terrorizmi” tipli ifadələri işlətmədiyinə görə Barak Obamanı tənqid edir.
