Şimon Peresin ömür yolu
Məşhur siyasətçi, israilli dövlət xadimi Şimon Peres sentyabrın 28-nə keçən gecə xəstəxanada vəfat edib. 93 yaşlı siyasətçi 13 gün əvvəl insult keçirmiş, Tel-ha-Şomer şəhərindəki “Şiba” Tibb Mərkəzinə yerləşdirilmişdi.
Novator.az bildirir ki, Şimon Peres 1923-cü il avqustun 15-də Polşanın Volozin şəhərində (indi Belarusun Volojin şəhəridir) doğulub. 11 yaşında valideynləri ilə birgə Fələstinə köçüb, Tel-Əvivdə böyüyüb, 1943-cü ildən sionist hərəkatının fəallarından olub.
1948-ci ildə İsrail dövləti yaradılanda Şimon Peres Hərbi-Dəniz Xidmətinə başçılıq edib, sonra ABŞ-ın Harvard Universitetində təhsil alıb.
1952-ci ildən Müdafiə Nazirliyinin baş direktoru olub, hərbi-sənaye kompleksinə rəhbərlik edib.
Şimon Peres 1959-cu ildə İsrail Fəhlə Partiyasından parlamentin deputatı seçilib, 1970-ci ildən nəqliyyat və kommunikasiya naziri, 1974-cü ildən müdafiə naziri olub, 1977-ci ildə baş nazirin səlahiyyətlərini icra edib.
1984-cü ildən Şimon Peres baş nazir, xarici işlər naziri, baş nazirin müavini və maliyyə naziri vəzifələrini tutub. 1993-cü ildə xarici işlər naziri postunda çalışarkən Fələstinlə sülh müqaviləsinin imzalanmasının memarlarından olub, 1994-cü ildə buna görə Nobel sülh mükafatına layiq görülüb.
1995-ci ildə yenidən baş nazir postuna keçən Şimon Peres sonralar müxtəlif hökumətlərdə regional əməkdaşlıq naziri, xarici işlər naziri, baş nazirin müavini vəzifələrində çalışıb.
2007-2014-cü illərdə İsrailin prezidenti olub.
